ما كل من يضحك بدنيـاه مسـرور
لو ضحكته دايـم تحـرك حـجاجـه

وما كل من يبكي من الناس مقهـور
بعض الدموع رخاص من شان حـاجه

وما كل صادق لو حكا لك من شعور
يا كثر من زيف المشـاعـر خراجـه

وما كل ما يخفا من السـر مستـور
بعض الوجيه ابين من ارهـف زجاجه

وما كل بيتٍ بابه انصـك مهجـور
كم بيتٍ اطفا الشح واهـج سـراجـه

وما كل وردٍ تزرعـه ينثر عطـور
لو ماه صافي ما يخالط هماجـه

وما كل مرهف قلب لو يزرع زهـور
قلب يحـب الورد وهو مثل صاجـه

وما كل من يخطي من الناس معذور
البعـض يخطي من علـوم العـواجـه

وما كل من يسكت على الظيم مجبور
لجل الغلا ساكت ويدعـي انفـراجـه

وما كل راسٍ ضيع الفكـر مسحـور
كم راس سحر الحب جاب ارتجـاجـه

وما كل علـه فادهـا طـب دكتـور
كم من علـيلٍ وصـل خلـه علاجه

وما كل من شاور حكيمٍ خذا الشـور
بعض البشر مـا يقنـع الا مـزاجـه

وما كل من سمي صقر يشبه صقور
كم من صقر وقت الشدايـد دجاجـه